Data Analyst လုပ်မယ်ဆို?

Data Analyst လုပ်မယ်ဆို လိုအပ်တဲ့ Skills တွေကို နှစ်ပိုင်းခွဲနိုင်ပါတယ်။ Technical နဲ့  Knowledge ပါ။ အရင်ဆုံး Technical Skill အကြောင်း ပြောကြရအောင်။ လိုအပ်တဲ့ Technical Skills တွေကတော့

1. Excel

2. Power BI/Tableau

3. SQL (Database)

4. Python Programming

1. Excel - စာရင်းတွေ၊ ဒေတာတွေကို အသိမ်းအများဆုံးက Excel ဖြစ်တဲ့အတွက် Excel ကို မဖြစ်မနေ ကျွမ်းကျွမ်းကျင်ကျင်သုံးတတ်ရပါမယ်။ Excel ထဲမှာတင် Data Clean လုပ်တာ၊ Format ပြောင်းတာ စတာတွေကို မဖြစ်မနေလုပ်တတ်မှ အဆင်ပြေပါမယ်။ Excel နဲ့ Power BI/Tableau ရရင် Junior Data Analyst တစ်ယောက်အဖြစ်လုပ်လို့ရပေမယ့် Excel ရဲ့ တချို့ကန့်သတ်ချက်တွေကြောင့် ကျွမ်းကျင်တဲ့ Data Analyst တစ်ယောက်ဖြစ်ဖို့   ဆို Excel တစ်ခုတည်းနဲ့ မလုံလောက်ပါဘူး။ ဒါပေမယ့် Data Analyst လုပ်မယ်ဆုံးဖြတ်ထားပြီးရင် Excel ကို အရင်ရရပါမယ်။

2. Power BI / Tableau - ဒီဆော့ဖ်ဝဲနှစ်ခုက Data Visualization အတွက်ပါ။ ကိုယ့်ရဲ့တွေ့ရှိချက်တွေကို ပုံလေးတွေနဲ့ ပြသပေးဖို့လို့ပဲ အလွယ်ပြောပါမယ်။ မြန်မာနိုင်ငံမှာက Power BI ကို အသုံးများပြီး နိုင်ငံခြားမှာက Tableau ကို အသုံးများပါတယ်။ တစ်မျိုးစီကောင်းကြတဲ့အတွက် နှစ်ခုလုံးကို သိထားဖို့လိုပါတယ်။ လောလောဆယ် Local မှာ အလုပ်ဝင်မယ်ဆို Power BI က ပိုကောင်းပါတယ်။ သင်ရတာလည်း ပိုလွယ်ပါတယ်။ Tableau မှာလည်း အားသာချက်တွေရှိတာကြောင့် ဒီနှစ်ခုလုံးကို သုံးတတ်ရင် ပိုကောင်းပါတယ်။

3. SQL (Database) - SQL ဆိုတာက Database Language တစ်ခုဖြစ်ပါတယ်။ ကိုယ့်အလုပ်ရဲ့သဘောတရားအရ Database ထဲက ဒေတာတွေဆွဲထုတ်ရတာမျိုး ရှိလာရင် SQL ရေးတတ်တာပိုကောင်းပါတယ်။ Senior Data Analyst တစ်ယောက်ဖြစ်လာဖို့အထိဆိုရင် Database Design တစ်ခုကို ကိုယ်တိုင်ဆွဲတတ်ဖို့ တနည်းအားဖြင့် ကိုယ့်ရဲ့ Power BI Report အတွက်လိုအပ်တဲ့ Data Mart တွေကို ကိုယ်တိုင်ဆောက်တတ်ဖို့အထိ လိုအပ်ပါလိမ့်မယ်။ Excel ဖိုင်တွေအများကြီးနဲ့ Power BI Report ဆောက်မယ်ဆို ကိုယ့်ရဲ့ Report ကြီးက အရမ်းလေးနေမှာမို့ပါ။

4. Python Programming - တကယ်ကြမ်းတဲ့ Data Analyst တစ်ယောက်ဖြစ်ဖို့ဆို Python ကို မဖြစ်မနေကို တတ်မြောက်ရပါမယ်။ Data တွေကို ဆွဲထုတ်တာ၊ Data Cleaning လုပ်တာ၊ Data Mart ဆောက်တာနဲ့ တခြားသော Task တွေကို အချိန်တိုအတွင်း အမြန်ပြီးဖို့ဆို Python Programming က မရှိမဖြစ်ပါ။ Senior Level အတွက် ပိုပြီးလိုအပ်တာဆိုပေမယ့် Data Analyst တစ်ယောက်လုပ်ပြီး ကုဒ်မရေးတတ်ရင်တော့ အချိန်တိုအတွင်း အလုပ်တွေအမြန်ပြီးဖို့တော့ ခက်ပါမယ်။ မျက်နှာလည်းငယ်ရပါလိမ့်မယ်။

Knowledge Skills တွေကို ဆက်ပြောပါမယ်။ လိုအပ်တဲ့ Knowledge Skills တွေကတော့ - 

1. Statistics

2. Domain Knowledge

3. Problem-Solving & Logical Thinking

1. Statistics - Data Analyst တစ်ယောက်အနေနဲ့ ပုံမှန် Descriptive Analytic အတွက် Statistics အများကြီးသိဖို့မလိုပေမယ့် Insight တွေ ရှာမယ်ဆို Statistics တတ်ထားဖို့က လိုပါတယ်။ ကိုယ့်ရဲ့ တွေ့ရှိချက်က ဘယ်လောက်အထိခိုင်မာတယ်ဆိုတာသိမှ ခိုင်ခိုင်မာမာ ပြောပြနိုင်မှာမို့ Statistics က မရှိမဖြစ်လိုအပ်ပါတယ်။ Junior Level မှာတော့ သိပ်မလိုအပ်သေးပေမယ့် Senior Level သွားမယ်ဆို မဖြစ်မနေ လိုမှာပါ။

2. Domain Knowledge - Domain Knowledge ဆိုတာက ကိုယ်လုပ်မယ့်လုပ်ငန်းနယ်ပယ်အကြောင်းပါ။ Banking, Retail, Sale, Marketing စသဖြင့် ကိုယ်လုပ်တဲ့နယ်ပယ်အလိုက် တီးမိခေါက်မိတော့ သိထားမှ Insight တွေကို မြန်မြန်ဆန်ဆန်ရှာပေးနိုင်မှာပါ။ Junior Level ကတော့ အလုပ်လုပ်ရင်း အလုပ်ထဲမှာစကားပြောရင်း သင်ယူသွားနိုင်ပါတယ်။ ကိုယ့်ဘာသာလည်း စာတွေရှာဖတ်ကြည့်ပါ။

3. Problem-Solving & Logical Thinking - ဒါကတော့ ကိုယ့်ရဲ့ Work Done Mindset လို့လည်း ပြောလို့ရပါတယ်။ Upper Management ကတော့ သူတို့ရချင်တဲ့ပုံစံကို ပြောပြမှာပါ။ ဒါကို ဘယ်လိုဖြစ်အောင် လုပ်ပေးမလဲဆိုတာကို ကိုယ့်ဘာသာပဲ အဖြေရှာရမှာပါ။

ကျွန်တော်ဆိုရင် လက်ရှိအလုပ်မှာ Statistically Analysis သိပ်မလုပ်ရပေမယ့် Report တွေ တော်တော်များများကို ဆောက်ပေးရပါတယ်။ ဒေတာနည်းတဲ့ Project တွေက ပြဿနာမရှိသေးပေမယ့် ဒေတာများတဲ့ Project တွေကျရင် Excel, Power BI တို့က မနိုင်တော့ပါဘူး။ ဒီအခါမှာ Different Approach ကနေ ချဉ်းကပ်ဖို့လိုလာပါပြီ။ ကိုယ်လိုချင်တဲ့  result တစ်ခုရဖို့ ဖြတ်လမ်းနည်းတွေသုံးရသလို စနစ်တကျလုပ်ရတာတွေလည်း ရှိပါတယ်။

ကိုယ်စဉ်းစားတဲ့ နည်းလမ်းအတိုင်း လိုက်အကောင်အထည်ဖော်ဖို့က Technical Skills ကောင်းဖို့လည်း လိုအပ်ပါတယ်။ ဒါကြောင့် Python နဲ့ Database နဲ့ကို လေ့လာဖို့ တိုက်တွန်းတာပါ။ ဥပမာ - User သုံးသန်းနီးပါးလောက်ပါတဲ့ CSV ဖိုင်ကို Excel ထဲမှာ ဖွင့်ကြည့်လို့တောင် မရပါဘူး။ ဒီဖိုင်တစ်ခုကို Power BI မှာတင်မယ်ဆို ရပေမယ့် ဒီလိုဖိုင်တွေက အများကြီးဖြစ်လာရင် Power BI က မနိုင်တော့ပါဘူး။ ဒီအခါမှာ ကိုယ့်ဘာသာ Data Mart ဆောက်ပေးရပါတယ်။ ဒီလိုတွေကြုံလာတဲ့အခါ ဒါတွေကို ရှင်းနိုင်ဖို့လိုပါတယ်။

စိတ်ဓာတ်ကျအောင် ပြောတာတော့မဟုတ်ပါဘူး။ ဖြစ်လာမယ့်ဟာတွေကို ကြိုပြောပြပေးတာပါ။ Senior Data Analyst တွေနဲ့ တွဲလုပ်ရလို့ လက်တွဲခေါ်ပေးရင် ကံကောင်းမှာဖြစ်ပေမယ့် Section တစ်ခုလုံးမှာ ကိုယ်ပဲရှိတယ်ဆို ကိုယ့်ကို ဘယ်သူမှ မကယ်နိုင်ပါဘူး။ ကိုယ့်ဘာသာပဲ အဖြေရှာရမှာပါ။ ဒါကြောင့် Problem Solving Skill ကောင်းဖို့လိုပါတယ်။

အသေးစိတ်အများကြီးပြောပြချင်ပေမယ့် အချိန်မရတဲ့အတွက် ဒီလောက်နဲ့ပဲရပ်ပါမယ်။ နောက်ပိုင်းမှာတော့ Recommend ပေးချင်တဲ့ Course တွေ၊ အကြောင်းအရာတစ်ခုအလိုက် ဘယ်လိုပြင်ဆင်သင့်တယ်ဆိုတာတွေကို ထပ်ရေးပေးသွားပါမယ်။

အဆင်ပြေကြပါစေ။

Zaw Myo Htet (Python Myanmar)